Konknnichem Konnak Poddlam? - G.R. Crasto

Konknnichem Konnak Poddlam?

Konknni Goenkaranchi maim-bhas. Avoik visorpi khub thodde melltole. Avoicho
sogleank mog. Ho mog utramni ami sogleakuch aikotanv. Utram-kornneamni omlant
haddpi mat bhov thodde. Hench Konknni sovem ghoddtta. “Konknnichem Konnak
Poddlam?” Ho Fausto babacho lekh gelea Mars-achea ankar vachlo. Vorsak barai
mhoine Konknnicho mog korpi bhov thodde mellttole. Punn jedna Konknni avoin
ulo marla tedna sonvsarachea chearui kon’xeamni aslelea putamni tika apli favo
ti mozot dilea. Iad zata. Novem Goem disallem suru korchea nimitan purai
Goeant iatra chol’li. Ami-i tatunt bhag ghetlolo. Pordesantleai Goenkaramni
apli ful nam paklli patthoili. Novem Goem suru zalem ani bhurgeaponnaruch
somplem. Kitlea Konknni mogianche teag! Khoim gel’lo? Khoim nam. Kitem
haddlem? Kaim nam. Poiso ektthail’lo to chotraien vapddunk zai aslo. Disallem
cholounk ghodonna zalear ek mhoinallem tor hea Konknni mogianchea ugddassak
sthapun dovrunk zai aslem. Toxem ghoddlem nam.

Uprant anik ek pautt Konknni avoin ulo marlo. Konknni Goenchi Raj bhas zaunchi
mhunn chollvoll suru zali. Chollvollik duddvanchi mozot zai asli. Konknni
Porjechea Avaz-ak nett euncho mhunn sonvsarak ximpoddlelea Goenkaramni anik ek
pautt Konknnik mozot keli. Hangasorlean ami kaim Goenkaranchea sangatan denngi
ektthavpant bhag ghetlo. Konknni Goenchi Raj bhas zali, anik Konknni Porjecho
Avaz xant zalo, bond zalo. Hoch boro soeg aslo cholvoll matxe fuddem vhoron ek
disallem nhoi zalear mhoinallem suru korpacho. Romi ani Nagri donui lipi sudam
vaprunk ietaleo. Heim ghoddlem nam. Vhoir kel’le mud’de, “Konknnichem konnak
podlam?” hea prosnak thoddo bhov zabab ditat. Punn voir dil’lea donui
ghoddneam vellar somiti ektthaim ieun vaur kel’lo ani somitichi nodor mottvi
zali. Hea somitincher zaite aropui aikunk ietale. Konknni porjen patthoil’lo
duddu aplea hatant asosor thoddea somitimni Konknnichi seva keli ani
uprant ...aichi poristhiti.

“Konknnichem konnak podlam?” Voilea don udharonnam vixim ek spoxtt zata.
Somiti vinchun kaddun Konknni jivi dovrunk titlem sompem nhoi. Kitleoxeo
Konknni sonstha utpon’n zatat. Tancheamni ektthaim ieun ek Konknni mhoinallem
porgott korcho vaur hatant gheunk zata. Punn zaite pautt hea sonsthancho avaz
aikotoch mhaka ‘ollbim pausantuch fultat’ tanchi iad zata. Eka disallea vo
mhoinallea udhexim Konknni jivi urteli zalear Konknniche je pixe asat tanche
hat ghott korchi chodd goroz asa. Thoddea pixeank Devan apoun vhele. Adlea The
Goa Times-ache sompadpi Sorg. Dr. Simon Fernandes, amchea mogache Pri. Freddy,
Felicio Cardoso hanchi maka iad zata. Khub kall Elly Bros. hannim Cine Times
porgottun Konknni vachpeanche anvdde bhagoil’le asat. Hea sogleanchi tust
korit titli komi, kiteak tannim dusreacher patieun nhoi punn aplea teagamni,
aplea poixeamni, aplo vell vibaddun Konknni vachpeanchi tan bhagoilea. Aiz
tanche sarkelo ekuch nomuno mhojea samkarak eta. Bab Faust Da Costa. Gulab, The
Goan Review, Goencho Avaz hanchem vojem aiz tannem aplea mathear ghetlelem
asa. Hem tachem vojem lohu korche khatir Konknni borovpeanchea ani
vachpeanchea suchnanchi chodd goroz asa. Survek amchi ek suchna. Khoincheim
tori ekuch masik mozbut korchem.

G. R. Crasto, Bahrain

http://www.goa-world.com/


Ank V Vors 23
Mai 2005


GULAB

Sthapnnar Sompadpi ani Uzvaddavpi:
Sorgest Fr. Freddy J. Da Costa

Sompadpi:
Fausto V . Da Costa

Sompadpi Somiti:
Prof. S M Borges
Soter R Barretto
Marcos Gonsalves

Protinidhi:
Mumboi: Fausto V. Da Costa, Tel. 22630139
Kuwait: Jose Antonio Gracias, Tel. 6064772
Res 4349830 (Code 00965)
Bahrain: G. R. Crasto, Off. 291166 Res. 296613
D. Goem: Fabian G. da Costa Tel. 2735379

Xhapkhanno:
Plot 85, Phase II C,
Verna Industrial Estate,
Verna, Salcete, Goa, India
Tel. 91-0832-782413, 782416 & 782431

E-mail: gulab_goa at sancharnet.in