Chotraien uloi, xik ani boroi

Chotraien uloi, xik ani boroi

Mauxi: Are Pedru baba tum khoim? Kitloch kall zalo tuji khoboruch na mu re?

Pedru: Age mauxe, tuka dislam mhonn toxem mhonnttam, tuvem mhoji khobor
ghetlea kitem? Hanv don pavtt voir bhonvun ailom. Fonddar don pavttim
khontto marleo. Ani atam tontto-kudd'ddo koso boddi gheun choltam.

Mauxi: Mhaka bhogos baba, hanv nokllo zalim. Ponn hem sang, kaim dis zale,
atam porno, novo adlo/novo, adlo/atancho oxem kitem cholta tem tuka khobor
asa ?

Pedru: Age, hoi ge, amche xapai bhormentle zage zaleat khoim! Ani
porno/novo, adlo/novo adlo/atancho Korar amche Konnni bhaxent ghalunk
sanglam khoim. Az kitlinch vorsam zalim konnuch khobor korinaslo. Dusrea
bhasamni ani Kon'nodd lipin Konknni bhaxantor kelear kitloch kall zalo, ani
atam....?

Mauxi: Amger ek porni almar asli ti bhair uddoun ek novi haddlea. Ani mhoje
mauxe-bhoinnin adli asli ti viklea ani atanchi ek bori sobta tosli haddlea.

Pedru: Oi ge atam te lojek poddleat. Kiteak zanna? Pornea /Adlea Koraracho
ek bhag namnechea boroupean bab Felicio Cardozan (Kardozon nhoi) Konknnint
bhaxantoraila. Mhonnttoch atam adlo ani novo mhonn vivad suru zala.

Mauxi: Atam hacher tujem mot kitem?

Pedru: Atam hanv je konn he somitint asat, tanche lagim hat zoddun magtam
uloita tem xika ani boroia. Ani hem xikunk (sud'dh lekhon zaunk), Amchea
omor Prof. Lourdin Rodriguesan Konknnichem veakron jem Gulab-ar ani V.
Ixtt-ar Amchi Bhas Xik mhonn porgottlam Mars 1983 tem Agost 1990 ani tantunt
"Dulobha Kallza Jezuchea" 1990 Abril, thoim sompoitana tannem sanglam "He
vishoim ani somoim..... hem soglem... bhov goroz asa..... Amche modhem
Kristi dhorm xastri asat ponn Konknni bhasxastri ani viakoronnkar na......
Mezar bosun, sogllem Kristi dhormik sahiteo, nitt, sud'dh, subh ani rochnent
(order) ghalchem. Ani toxench hanvem oslea zaitea adharan chotraien uloi" ho
bhag V. Ixtt-ar suru kelolo to 29-4-1993 pasun chol'lo. Toxench hanvem tea
osud'dh "Xelli" utrak lagun Gulab Nov. 88 Agnus hem utorlam - cordeiro -
menddrum oxem boroilam tem vachchem mhonn magtam. Konknni, Moratthi, Hindi
oxinch utram uloitat boroitat ani melltat.

Zori tor, him sogllim boroupam hea somitichea vangddeanche nodrek naslim vo
na zalear hanv raji asam tim diupak, ponn ek magtam, tumcho ho mhotvacho
vavr ugtea monan kora. Vattevoilem, bazarantlem haddun osrear dovorchem
nhoi.

Hea mhotvachea kama khatir thodde nomunne ditam:

Jezuchea Povitr Kuddi Rogtachi Porob V. I. 14/6/03 pan. hem oxem kiteak?
Kudd mhonnttoch tem Mas ani Rogot Povitr Kuddichi vo Masa-Rogtachi oxem
boroilear puro. Soro tem dakancho ros borounchem. ? J. E. Saldanha


Bapachea Gopant
Piedade Fernandes

Kepencho, amcho bhav Piedade Fernandes aple piddeche koxtt vhodde
sosnnikaien ani mogan soslea uprant, Agostache 5 ver, sanjer Bapachea gopant
portolo. Tachi pirai 72 vorsam asli. Aple potini sangata apleam panchui
bhurgeank bore dekhi ritin vaddoilim ani aple eke dhuvek somazache seve
khatir Madr Terezache Missionaries of Charity he Sonvsthechi Madr zavnk
bhettoili. Sodeak ti Amerikent vavurta. To sodanch hanstea tonddan sogleank
vagoitalo. Dusrea disa Igramoll vaddeantlea Kapelant tachea mornna vidi
zali. Pilarchea Fr. Agnel Kolejicho Principal Pri. Freddy Rodrigues mukhel
Iadnik asun sangatim Mis bhettoilem ani V. Ixtt-acho Sompadpi Pri. Peter
Raposo hannem provochon kelem. Kepencho Kur Pri. Tomas hannem simiterint
nimnim magnnim orpun kudd nikhipili. Amchi buzvonn tachea kuttumbak.

NICHEU KORI `WORLD GOA DAY' DISA

Mhojea mogall Goenkar bhava-bhoinnimno,
Atam donuch utram ghaltam tumche mukhar;
Supurloso, vellar, tumkam ugddas korunku,
Lagim pavla vhoddlo dis, zanv-ia ami toiar
Sobounk World Goa Day, hem tach' 4tem voros,
Gazonv ia tem odik, heram vorsam poros.
Ho dis rochlo 2000 vorsa bab Rene Barrett-an,
Novea itihasaicho ugddas amchea kallzant rigunk;
Konknni zali mhonn amchi Rajbhas Goeam,
Bharot-ghottnneche 8ve Vollerint ti poddun.
Hem ghoddlem 20ver Agostache 1992 vorsa,
Ponn azun koslo tacho faido ami kaddla?
Dha vorsam zaun gelim, torii ami nhidleanv,
Beporva kortanv ami amche Konknni bhaxechi;
Ti ulounk dha-zonnam modem ami loztanv,
Visrun ti zaun asa mhonn Osmitai amchi.
Ti jikhunk 1987, bhoktiamni rogot legun vharoilem,
Atam koxem tankam ami rinn farik korchem?
Agostache 20ver nicheu korum-ia Konknni ulounk,
Zori konn nokllo, tannim xikunk suru korunk zai;
Nam tor ek dis poddtelem amkam dukham gollounk,
Goenchi Rajbhas fuddem Moratthi zait kai!
Kiteak chodd Moratthivale Goeam kortat toiari,
Goenchi Rajbhas ek dis zauncheak ti Moratthi.
Chintun polleiat kosle bhognnar amche zait te,
Oi, amche tornatte fugar zatole bekarponnan;
Maharaxtrantle tornatte ieun Sorkari zage bhortele,
Amche niraxi zaun jiv ditele vo vetelet pordesant.
Xekim Goem zaun vetolem Vishal Gomantak,
Ang xirxirta mhojem, oslem dolldir chintcheak.
Kitle koxtt korun jikloleanv ti Rajbhas,
Ponn ami kainch kelem nam ti rakhunk;
Inglez-uch tasun denvoilo ami ticho prokas,
Zaite Padri legun laglet Inglezin sermanv sangunk.
Morathivaleamni atam novean zhuz suru kelam,
Koslim zanvchim atam amchim hatiaram?
Ekuch upai: vaddounk amcho Konknni ankddo:
Xikat, uloiat Amchi Bhas, ho mhozo nimno ulo!

-- Basilio Magno (Spain)